KUCHING: Sitak Pakan enda patut dikumbai pelilih menua pemadu seranta ba Malaysia.

Nyemetak madahka pekara tu, Kaban Kunsil Nengeri (ADUN) Pakan, Tan Sri William Mawan Ikom lebuh dirandau begulai enggau Unit Komunikasyen Perintah Sarawak, Cats FM enggau TVSarawak, apin lama ke udah.

Kenu ku iya, asil pansik ti ngumbai Pakan entara tujuh ari sepuluh pelilih pemadu seranta ba Malaysia mega patut dikenggai.

“Peranak Pakan nyengkaum aku empu tekenyit enggau chukup malu lebuh meda asil pansik nasional pasal polisi pemansang menua pesisir di baruh Opis Menteri Pemansang Menua Pesisir enggau Kandang Menua madahka Pakan ngetuaika lis seranta menua.

“Ba penemu aku, asil pansik nya nyangka betul enggau nyangka mega enda betul laban pansik nya dipejalai chara enda nyerangkung semua pekara, nya kebuah nadai pematut ngumbai Pakan nyadi pelilih pemadu seranta ba Malaysia,” ku iya.

Ex-Menteri Pemansang Rama Sarawak nya nambah, pekara nyata ke alai semua sitak ba DUN Pakan diatu udah dibungkur sistem bekal kuasa karan urung 98 peratus.

Ku iya, urung 60 peratus genturung pendiau ba sitak nya mega udah nerima bekal ai beresi.

“Nya alai aku deka nesau Menteri Pemansang Menua Pesisir enggau Kandang Menua Datuk Seri Rina Harun enggau penganalisis ekonomi Profesor Madya Dr Madeline Berma datai sendiri ke Pakan ngambi meda empu pemansang ti bisi ba Pakan diatu.

“Naka pekara ditemu aku, peranak menua tu nadai kala kebuluran tauka minta makai tauka pemakai ari orang bukai, enti bisi pen tubuh sida tu nadai nyengala mayuh, ” ku iya madah nyemetak.

Apin lama ke udah, sebengkah penerang surat berita madahka, Rina udah mantaika Pakan antara pelilih menua pemadu seranta ba Malaysia ari rejista penatai pemisi isi bilik RM2,760 sebulan.

Kelimpah ari Pakan, pelilih Lubok Antu, Song, Kanowit, Selangau, Simunjan enggau Daro mega dilis 10 pelilih menua pemadu seranta ba menua tu